Cambiamos de espazo. Esperamos que para mellor. En 10 segundos enlazarás a nova páxina. Se desexas acceder directamente, pulsa no seguinte enlace. Grazas e desculpa as molestias www.amigosdopatrimoniodecastroverde.gal

05 octubre, 2013

Os libros convértense en arte na mostra Terra e Papel que acolle a Capela de Santa María


Regina Polín e o artista Fonso Castro presentaron esta mostra que reúne 20 pezas e que se poderá visitar ata o 30 de novembro
O autor empregou diferentes técnicas para construír as súas obras e instalacións artísticas que son unha homenaxe ós libros e a Cantares Gallegos de Rosalía de Castro
A Deputación impulsa con esta exposición o traballo de artistas lucenses que contan cun espazo para dar a coñecer as súas creacións
A Deputada de Deseño e Artesanía, Regina Polín, e o artista Fonso Castro presentaron este mércores a mostra Terra e Papel que acollerá a Capela de Santa María. A exposición reúne 20 creacións que teñen o libro Cantares Gallegos de Rosalía de Castro como inspiración e nas que o autor emprega técnicas diversas.
Regina Polín salientou a revisión que nesta mostra fai Fonso Castro do clásico da cultura galega Cantares Gallegos, de Rosalía de Castro así como dos libros en xeral como obxectos. A Deputada destacou que nas pezas expostas obsérvase unha evolución do libro clásico a un libro convertido en arte e salientou que “dende a institución provincial, damos deste xeito a oportunidade a novos artistas que queren dar a coñecer a súa obra, e ofrécennos a súa visión da cultura na actualidade”. Pola súa banda, o artista agradeceu a oportunidade que supón expoñer e amosar ó público as súas creacións nun espazo como a Capela de Santa María.
A exposición denomínase Terra e Papel pola vinculación dos poemas de Rosalía de Castro coa terra e tamén porque en moitas das creacións emprégase o barro. O autor utiliza tamén o poliéster, a madeira ou o papel nas súas pezas. Entre as creacións que se expoñen destacan murais con libros de barro impresos, unha escultura de madeira de castiñeiro con papel impreso polimerizado ou o que o autor denomina “libro de artista”, instalacións elaboradas con exemplares do libro Cantares Gallegos e que se sitúan en maletas nas que se empregan ademais madeira ou barro.
A mostra Terra e papel permanecerá aberta en horario de luns a venres de 10:30 a 14:00 horas e de 17:00 a 20:00 horas. As fines de semana o horario é de 11:00 a 14:00 e de 17:00 a 20:00 horas. Inaugúrase este xoves ás 20:00 horas e poderase visitar de xeito gratuíto ata o vindeiro 30 de novembro.

http://www.deputacionlugo.org/portal_localweb_ag/p_20_contenedor1.jsp?seccion=s_fnot_d4_v1.jsp&contenido=22293&tipo=8&nivel=1400&layout=p_20_contenedor1.jsp&codResi=1&language=gl&level=1#sthash.cjx88ylU.dpuf

No hay comentarios: